近年耳機流行入耳式加ANC主動降噪,不過又有唔少人同Gadget Gang反映,其實唔想同個世界咁隔離。Sony新出LinkBuds就可能啱唔鍾意入耳嘅用家喇!
官方話用開放設計,外型相當特別,好似一個水泡再加一個波。印象中真無線TWS耳機都好少係非入耳造型,可能為咗配戴穩定同要裝唔同電子零件,所以做咗呢個咁cute cute嘅設計。
![SonyLinkBuds_w](https://www.gadgetganghk.com/wp-content/uploads/2022/02/SonyLinkBuds_w-1024x576.png)
之前嘅WF-1000XM4大受歡迎,LinkBuds走輕巧方向,比WF-1000XM4細咗51%,單邊僅重4.1g。水泡入面係特製12mm環狀單元,配高柔度隔膜,輕巧得嚟都可以有唔錯嘅中高音表現。會有5個唔同size嘅耳翼supporter配件,保証戴得夠穩。
![LinkBud_theme](https://www.gadgetganghk.com/wp-content/uploads/2022/02/LinkBud_theme-1024x576.jpg)
功能方面,Adaptive Volume Control會因應環境自動調校大細聲,跑步時播歌會大聲啲,附近有交通工具(例如等巴士時)會播細聲啲,等你留意路面情況。
另外唔少耳機都可點擊機身作不同操作,LinkBuds嘅Wide Area Tip唔使直接點機身,點耳仔前少少位置都感應到。多數TWS耳機都麻麻嘅通話功能方面,都用咗AI技術做收音降噪。ANC主動降噪就冇嘅,用得LinkBuds就開放啲啦~
![LinkBud_access](https://www.gadgetganghk.com/wp-content/uploads/2022/02/LinkBud_access-1024x576.jpg)
整體嚟講呢款LinkBuds有好多新想法,但未必滿足到對規格有要求高嘅燒友,雖然用咗支援DSEE音質強化技術的V1處理器,但藍牙偏碼僅支援AAC、SBC。
售價就賣$1,490,3月10日正式發售,即日起至3月6日接受預售。
![LinkBud_charge](https://www.gadgetganghk.com/wp-content/uploads/2022/02/LinkBud_charge-1024x576.jpg)