歐盟喺今個星期正式通過電子產品統一採用Type-C充電接口提案，經過歐洲議會同27個聯盟國嘅代表同意，正式確立USB-C為電子裝置嘅通用充電接口標準。
預計喺2024秋季前，手機、平板電腦、數碼相機、藍牙耳機等電子產品嘅充電接口都要改為採用Type-C，而手提電腦嘅期限會擴展至40個月。
其實呢項提案早喺去年九月由歐盟提出。主要目的有兩個：
一）希望消費者喺購買充電用品嘅時候可以更好辨識規格。
二）希望可以減少更多電子廢物。歐盟表示：新嘅規定可以促使更多充電器被重複使用，以幫助消費者每年慳返高達2.5億歐元不必要嘅購買充電器開支。
喺過去10年中，已有唔少電子產品廠商經過交涉後，由30多個充電接口減少至3個。現時大部份手機生產商已採用Type-C充電，只有Apple iPhone同Airpods仍採用自家lightning接口。
雖然喺2020年嘅時候Apple曾話過通用充電接口會「扼殺創新」，但Macbook同iPad都改為採用Type-C，有坊間都話Apple iPhone漸漸轉向Type-C充電。就等我地拭目以待iPhone之後嘅Type-C充電，你地又覺得嚟緊iPhone14轉Type-C嘅可能大唔大呢？
#usb #iPhone14 #Apple #歐盟 #TypeC #lightning